قصص جميلة فيها عبرة

طيارة تعطلت وسقطت بوسط قارة افريقيا بالادغال
كل الركاب والطيارين ماتو فورا ونجا 3 ركاب فقط
تعرفو على بعضهم
1.جون من اميركا
2. لويس من فرنسا
3. جبار من العراق
تناقشو وتفقو يمشو حتى يوصلون لشي قرية او مدينه ويطلبو المساعدة
بعد مسيرة يومين هجمت عليهم قبيلة من اكلي لحوم البشر وكضوهم واخذوهم للقريه مربطين
اجتمعوا قادة القبيله بالخيمة وطلعو گالو نحن قررنا نسويكم تكه وكباب
صارو يترجوهم ويطلبون منهم يعرفون السبب
گاللهم واحد من الزعماء
انتو معشر البشر البيض اغبياء وشايفين حالكم اعلى مرتبه واذكى من عدنه
تشجع الاميركي وگاللهم
طيب اذا سآلتكم سؤال وماعرفتوا جوابه تعوفونه اجتمعوا الزعماء وقرروا كل واحد من ذولي يسآل سؤال واحد اذا عرفوا الجواب يهفونه بوري على راسه
واذا ماعرفوا السوال يعوفونه يمشي .
الاميركي سألهم شنو هيه ناطحات السحاب ؟
دخلو الزعماء بالخيمة وبعد 3 ساعات طلعو ..
گالو واضحة .
هيي كتل مبنية فوق بعضها بارتفاعات كبيرة توصل
ل حدود الغيم لهيج سموها ناطحات السحاب ...
اخذو الامريكي وهفوه بوري معدل على يافوخه
اجو للفرنسي ...
گاللهم شنو هوه برج ايفل ؟
دخلو الزعماء الخيمة وطلعو بعد 5 ساعات .
گالوله من اسمه مبين برج عالي
وموجود بمدينه ضخمه وعصرية .
انجلط الفرنسي ..
اخذوه وأخذ المقسوم من البواري الزينه
اجى دور العراقي جبار ..
سألهم شنو هوه البرلمان العراقي ؟
راحواجتمعو 24 ساعة
طلعو گالوله ممكن تعيد السؤال .
گاللهم شنو هوه البرلمان العراقي ؟ ؟
فاتو اجتمعو 3 تيام بلياليهن طلعو گالوله
سؤالك ماعرفنا جوابه
هسه انته حر واذا تريد تروح اتوكل
بس بالآول انريد تگلنه شنو هوه البرلمان العراقي ؟؟ !
گاللهم سوال بسيط هوه
شله مال عفطيه مثلكم ..
يروحون يجتمعون ويطلعون قرارات طايح حظها
وبعدين يضربون الناس بواري
مع احترامي للخيرين منهم